უარი - ვიდეოგამეორებებს

ფიფას 124-ე ყრილობაზე მიღებული გადაწყვეტილების თანახმად, მსაჯებისთვის ვიდეოტექნიკას არ გამოიყენებენ და ამ კუთხით აღარც ექსპერიმენტები ჩატარდება.

24 საათი 10.03.10

ამას ფიფას ოფიციალური ვებგვერდი ამავე ორგანიზაციის გენერალური მდივნის ჯერომ ვალკეს სიტყვებზე დაყრდნობით იტყობინება.

“მივიღეთ გადაწყვეტილება, რომ კარის ხაზზე ბურთის მდებარეობის გასარკვევად ახალი ტექნოლოგიები არ გამოვიყენოთ და ამ მხრივ ექსპერიმენტების ჩატარებას აღარ ვაპირებთ. შეკრებაზე ერთი მარტივი კითხვა დავსვით - დავნერგოთ თუ არა ახალი ტექნოლოგიები ფეხბურთში. პასუხი ასევე მარტივი იყო: უმრავლესობამ თქვა - არა. ეს ტექნოლოგია რომ დაგვენერგა, მისი გამოყენება მოგვიწევდა თამაშგარე მდგომარეობისა და ყველა საკამათო სიტუაციის გასაანალიზებლად. ფეხბურთი კი ვიდეოგამეორებად იქცეოდა. გვინდა, ეს თამაში ისეთად შევინარჩუნოთ, როგორიც ახლაა”, - თქვა ვალკემ.

სტატიის მისამართი: http://24saati.ge/index.php/category/sport/2010-03-10/4194.html