ახალი ჟურნალი - ახალი სასწავლო წლიდან

განათლებისა და მეცნიერების მინისტრმა დიმიტრი შაშკინმა პედაგოგებს ახალი სასკოლო ჟურნალი წარუდგინა და მოსწავლეთა შეფასების ახალი სისტემა გააცნო.

24 საათი 03.07.10

შეხვედრას სამინისტროს ეროვნული სასწავლო გეგმებისა და შეფასების ცენტრის, ასევე მასწავლებელთა პროფესიული განვითარების ცენტრის წარმომადგენლებიც ესწრებოდნენ.

განათლების სამინისტროს ინფორმაციით, ახალი სასკოლო ჟურნალი განკუთვნილია ორი სხავადასხვა ასაკობრივი კატეგორიისთვის (I-IV კლ. და V-XII კლ.) და სექტემბრიდან ამოქმედდება. მომავალი ჟურნალი საწარმოებლად გაცილებით მარტივი, ინფორმაციულად დატვირთული და გაყალბებისგან დაცული იქნება.

იცვლება მოსწავლეთა შეფასების სისტემაც, რომელიც მასწავლებლისთვის მარტივი, ბავშვისა და მშობლისთვის კი გამჭვირვალე ხდება. აღარ იქნება პროცენტების გამოთვლის საჭიროება, ათბალიანი სისტემით შემოიღებენ სამ ნიშანს და სამივეს თანაბარი დატვირთვა ექნება. ცოდნა სამი კომპონენტის მიხედვით შეფასდება - საშინაო დავალება, საკლასო სამუშაო და საკონტროლო წერა. ტრიმესტრულის ნაცვლად კი, სემესტრული სწავლება დაწესდება.

შეხვედრაზე მასწავლებლები აქტიურად ჩაერთნენ ახალი ჟურნალის სამუშაო ვარიანტის განხილვაში. ჟურნალის საბოლოო ვარიანტი კი მათი შენიშვნებისა და წინადადებების გათვალისწინებით შეიქმნება .

სტატიის მისამართი: http://24saati.ge/index.php/category/society/education/2010-07-03/8247.html