საფრანგეთს კონკურენტები გამოუჩნდნენ

ვერტმფრენმზიდ "მისტრალის" ყიდვის შესახებ საფრანგეთისა და რუსეთის მოლაპარაკებებს ბევრი პრობლემა გამოუჩნდა.

თამთა კახაძე

24 საათი 09.09.10

ვარაუდობენ, რომ გარიგება მთლიანად ჩაიშლება. მოლაპარაკებები მას შემდეგ შეჩერდა, რაც ამ ზაფხულს რუსეთმა აღნიშნა, რომ ხომალდის შესყიდვაზე საერთაშორისო ტენდერის გამოცხადებას აპირებს. საფრანგეთს უეცრად გამოუჩნდა ისეთი კონკურენტი, როგორიც სამხრეთ კორეაა. და არა მარტო ის.

ტენდერის შესახებ განცხადება ქვეყნებს შორის მოლაპარაკების დაწყებიდან ნახევარი წლის შემდეგ გაკეთდა. ამ განცხადებამ საფრანგეთის პრეზიდენტი ნიკოლა სარკოზი აიძულა, თავისი წარმომადგენელი დამატებითი ინფორმაციის მოსაპოვებლად კალინინგრადში გაეშვა.

ასევე შეიძლება, გარიგებას ამერიკამ შეუშალოს ხელი. ფრანგულ ხომალდზე დამონტაჟებულია ამერიკული წარმოების ელექტრონული სისტემა, რომელიც ინფორმაციის მისაღებად არის აუცილებლი. ეს სისტემა შეიარაღებას არ ეხება.

ამერიკამ სავსებით შესაძლოა, არსებული საერთაშორისო ნორმებით იხელმძღავნელოს და ამერიკაში დამზადებული მოწყობილობის გაყიდვის აკრძალვა მოითხოვოს.

რუსეთის მიერ მსგავსი თანამედროვე ხომალდის ყიდვა ზოგიერთი ქვეყნის შეშფოთებას იწვევს. ამ გარიგებას კატეგორიულად ეწინააღმდეგებიან ბალტიის ზღვის ქვეყნები, საქართველო და პოლონეთი. ევროპარლამენტის დეპუტატები აღნიშნული გარიგების მიმართ პროტესტის შემცველი რეზოლუციის მიღებას აპირებენ. მოლაპარაკების გამო ამერიკაც ღიად გამოთქვამს უკმაყოფილებას.

შეთანხმებას მოწინააღმდეგეები თავად რუსეთშიც გამოუჩნდნენ. სამხედრო-საწარმოო კომპლექსის წარმომადგენლები, რომლებსაც სამსახურის შენარჩუნება სურთ, არ მალავენ, რომ ურჩევნიათ ხომალდი ქვეყანაში თვითონ ააწყონ.

როგორც რუსეთის თავდაცვის მინისტრმა ანატოლი სერდიუკოვმა განაცხადა, ტენდერში მონაწილეობას მიიღებს როგორც უცხოეთის, ასევე რუსეთის გემების მწარმოებელი კომპანიაც. ტენდერის ზუსტი თარიღი 45 დღეში გახდება ცნობილი.

სტატიის მისამართი: http://24saati.ge/index.php/category/news/world/2010-09-09/9313.html