საჯარო რეესტრში სკანირების ცენტრი გაიხსნა

საქართველოს იუსტიციის სამინისტროს საჯარო რეესტრის ეროვნულ სააგენტოში თანამედროვე კომპიუტერული ტექნიკით და საოფისე ინვენტარით აღჭურვილი სკანირების ცენტრი გაიხსნა.

24 საათი 15.03.10

სკანირების ცენტრის საქმიანობა საჯარო რეესტრის ელექტრონული არქივის შექმნის პროცესს დააჩქარებს და მონაცემთა ერთიანი ბაზის სრულყოფას შეუწყობს ხელს.

საჯარო რეესტრში შესული დოკუმენტები, სკანირების შემდეგ, ერთიან მონაცემთა ბაზაში განთავსდა. პარალელურად მიმდინარეობს არქივში უკვე წლების განმავლობაში დაგროვილი დოკუმენტების ელექტრონულ არქივში გადატანა.

ტექნიკური აღრიცხვის ბიუროების საარქივო მასალა, რომელიც საჯარო რეესტრშია დაცული, ხშირ შემთხვევაში უძრავ ქონებაზე უფლების რეგისტრაციის ერთადერთი და ძირითადი საფუძველია. საჯარო რეესტრის თანამშრომლებს თითქმის ყოველდღიურად უხდებათ საარქივო მასალებთან შეხება. მათი უმრავლესობა საკმაოდ ძველია. იქმნება საფრთხე, რომ დროთა განმავლობაში, ხშირი გამოყენების გამო, შესაძლებელია დოკუმენტები დაზიანდეს ან განადგურდეს. სწორედ ამიტომ გახდა აუცილებელი მათი ელექტრონულ ფორმატში შენახვა.

"საქართველოს მასშტაბით, საჯარო რეესტრის ტექ-ბიუროს არქივში, დაახლოებით 500 000 საქმეა დაცული. დღეისათვის ელექტრონულ ფორმატში საქართველოს 11 რაიონის 71 000-მდე მონაცემია შენახული. თანამედროვე ტექნოლოგიებით აღჭურვილი სკანირების ცენტრი ელექტრონული არქივის სრულყოფის პროცესს მნიშვნელოვნად დააჩქარებს. ელექტრონული არქივის შექმნა ასევე გაამარტივებს უძრავ ქონებაზე უფლების რეგისტრაციის პროცედურებს, ხელს შუწყობს მოქალაქეთა მომსახურების სისწრაფეს და ხარისხის გაუმჯობესებას. გარდა ამისა, მნიშვნელოვნად უმარტივდებათ მუშაობა სააგენტოს თანამშრომლებსაც. მათ შესაძლებლობა აქვთ ელექტრონულად გაეცნონ არქივში დაცულ დოკუმენტებს (ქაღალდის ვერსიის გარეშე), რაც დროის დაზოგვასა და დოკუმენტაციის დაკარგვის ალბათობას მნიშვნელოვნად ამცირებს," - აცხადებს სააგენტოს თავმჯდომარე სოსო წიქარიშვილი.

ინტერპრესნიუსი

სტატიის მისამართი: http://24saati.ge/index.php/category/news/justice/2010-03-15/4327.html