კომერციული ბანკების მიერ გაცემული სესხები 1.1 პროცენტით გაიზარდა

საქართველოში მოქმედმა კომერციულმა ბანკებმა მიმდინარე წლის იანვარში, გასული წლის დეკემბერთან შედარებით, 1.1 პროცენტით მეტი სესხი გასცეს.

24 საათი 03.03.10

ეროვნული ბანკის ინფორმაციით, კომერციული ბანკების საკრედიტო დაბანდების მოცულობამ (არარეზიდენტებზე გაცემული სესხების ჩათვლით), მიმდინარე წლის 1 თებერვლის მდგომარეობით, 5.2 მლრდ ლარს გადააჭარბა.

აღნიშნულ პერიოდში ეროვნული ვალუტით გაცემული სესხების მოცულობა 0.2 პროცენტით, ანუ 2.2 მლნ ლარით, ხოლო უცხოური ვალუტით გაცემული სესხების მოცულობა 1.3 პროცენტით, ანუ 53.4 მლნ ლარით გაიზარდა.

რეზიდენტი იურიდიული პირებისთვის 2010 წლის იანვრის ბოლოს კომერციულ ბანკებს ეროვნული ვალუტით გაცემული ჰქონდათ 548.7 მლნ ლარის, ხოლო უცხოური ვალუტით - 2.4 მლრდ ლარის მოცულობის სესხი.

2010 წლის იანვრის განმავლობაში 0.8 პროცენტით ანუ 15.7 მლნ ლარით გაიზარდა ფიზიკური პირების დაკრედიტების მოცულობა და 1 თებერვლისთვის 2.0 მლრდ ლარს გადააჭარბა.

ინტერპრესნიუსი

სტატიის მისამართი: http://24saati.ge/index.php/category/business/2010-03-03/4109.html